Svaf og spilaði Alias með setuliðinu

„Ég er eiginlega með víðáttubrjálæði núna, það eru svo margir staðir til,“ segir Brynja Sóley Plaggenborg, sem hreppti heimsreisu frá ferðaskrifstofunni KILROY með því að leggja á sig fjögurra sólarhringa setu utan við skrifstofuna í síðustu viku. „Ávísunin sem ég fékk er upp á 400 þúsund og ég ætla að fá ferðaskrifstofuna til að hjálpa mér að setja saman ferð,“ bætir hún við.

Brynja Sóley, sem býr í Skaftholti í Gnúpverjahreppi, varð stúdent síðasta vor og er ekki í skóla í vetur enda var á dagskrá hjá henni að ferðast um heiminn á næstunni. Þegar hún sá auglýsinguna frá KILROY um ferðavinninga fékk sú þrá byr undir báða vængi. „Ég vildi verða fyrst í röðinni, fékk frí í vinnunni, fór með strætó í bæinn og kom mér fyrir utan við KILROY á Skólavörðustígnum. Um sex tímum seinna komu tveir strákar, þeir biðu líka allan tímann því fleiri vinningar voru í boði. Strákarnir voru fínn félagsskapur. Við spiluðum mikið, bæði á 52 spil og líka Alias, sem þeir voru með.“

Brynja Sóley segir móður sína hafa sinnt sér vel meðan á setunni stóð. Hún hafi komið með mat, kraftgalla og vindsæng meðal annars. „Sunneva systir mín var líka mjög dugleg að færa mér eitthvað. Henni fannst alveg gaman að hanga þarna,“ segir Brynja, sem nýtti sér snyrtingu ferðaskristofunnar á daginn, sofnaði seint og vaknaði snemma þessa fjóra sólarhringa. -gun