New Regency endurgerir Borgríki í Hollywood

„Ég á von á að við klárum samninga á næstu dögum," segir leikstjórinn Ólafur Jóhannesson um samning við kvikmyndarisann New Regency um endurgerð á íslensku spennumyndinni Borgríki.

Aðdragandinn hefur verið nokkuð langur en það var strax í haust, fyrir frumsýningu Borgríkis á Íslandi, sem Ólafur gerið samning við umboðsskrifstofuna Principal Entertainment. Þar komst hann í samband við Hollywood framleiðendurna James Mangold og Cathy Conrad sem sáu til þess að New Regency fékk veður af myndinni en Mangold og Conrad eru með myndir á borð við Walk the Line, Girl Interrupted og Scream 1, 2, 3 og 4 á ferilskránni.

„Kathy Conrad og James Manigold eru mjög stór nöfn í bransanum. Nú fer ákveðin undirbúningsvinna í gang þarna úti undir þeirra stjórn. Það er verið að finna góða handritshöfunda sem geta aðlagað handritið að bandarískum veruleika en ekki er komið neitt á hreint með leikstjóra eða hvaða borg verður sögusviðið," segir Ólafur en New Regency er eitt af stærstu framleiðslufyrirtækjum í Bandaríkjunum.

„Þetta er mjög stórt og við Kristín Andrea, sem framleiddi Borgríki með mér, erum komin með sterkan lögfræðing til að sjá um okkur þarna úti því þetta er mikill frumskógur."

Bíómyndin Borgríki sló í gegn hérlendis og er Ólafur þegar byrjaður að huga að framhaldsmynd. Ólafur skrifar sjálfur handritið í samvinnu við Hrafnkel Stefánsson og er fyrsti hluti þess tilbúin.

„Við erum byrjuð að undirbúa Borgríki 2 og í vikunni höfum við verið að búa til stiklu fyrir fjárfesta," segir Ólafur sem getur ekki gefið mikið uppi með söguþráðinn í framhaldsmyndinni en hann á von á því að aðalleikaranir verði þeir sömu, þau Ágústa Eva Erlendsdóttir, Ingvar E Sigurðsson, Sigurður Sigurjónsson og Zlatko Krickic.

Þrátt fyrir að undirbúningur sé hafinn á Ólafur von á að nokkur bið verði í myndina sjálfa. „Ég mundi telja að það væru allavega eitt til tvö ár þangað til við hefjum tökur."

alfrun@frettabladid.is