Milu Kunis dreymir um stærri rass

Mila Kunis er eflaust öfunduð af mörgum fyrir útlit sitt, enda margoft verið valin á alls kyns lista yfir kynþokka og fegurð og er eftirsótt af mörgum.

Hún er þó ekki fullkomlega ánægð með sjálfa sig, frekar en flestar konur. Í viðtali við leikkonuna. sem kemur til með að birtast í aprílhefti Bazaar-tímaritsins opnar hún sig meðal annars um það að hún vildi óska þess að hún væri með stærri rass.

Kunis ræddi alls kyns mál í viðtalinu og sagðist meðal annars vera á móti lýtaaðgerðum, en að ef hún yrði spurð álits á þeim aftur eftir 10 ár væri þó aldrei að vita nema sú skoðun hefði breyst.

Leikkonan er ættuð frá Úkraínu, en hún flutti til Bandaríkjanna með fjölskyldu sinni þegar hún var 7 ára gömul. Flutningarnir voru henni afar erfiðir og hún segist ekki muna eftir fyrsta árinu í Bandaríkjunum. Hún segist hafa verið eins og blind og heyrnarlaus fyrst um sinn, en hún kunni ekki stakt orð í ensku.

Kunis er einhleyp, en hún hætti með kærasta sínum til átta ára, barnastjörnunni Macaulay Culkin, árið 2010. „Ég var hamingjusöm í sambandi, en ég er líka hamingjusöm ein," segir Kunis í viðtalinu og bætir við að hún fari ekki mikið á stefnumót, og þyki best að eyða kvöldum í rólegheitum heima hjá sér með gott vínglas í hönd.