Í fullu starfi sem víkingur

Víkingafélagið Einherjar fagnar fjögurra ára afmæli sínu í dag, á baráttudegi kvenna. Formaður félagsins segir víkingalífið vera lífsstíl útaf fyrir sig og sjálfur er hann fullstarfandi víkingur.

Gunnar Víking Ólafsson stofnaði Víkingafélagið Einherja 8. mars árið 2008 og er hann einnig formaður félagsins. Fjórtán manns eru skráðir í félagið, þar af tvær konur, og tekur Gunnar fram að það sé ávallt pláss fyrir fleiri meðlimi. „Við erum sýningamenn og hittumst þrisvar í viku og æfum skylmingar og vopnaburð fyrir sýningar. Það er nóg pláss fyrir nýliða í okkar röðum. Það eina sem fólk þarf að gera er að hafa samband eða kíkja niður í húsnæði til okkar. Sítt hár og skegg er ekki nauðsynlegt en nýliðar verða að sækja námskeið í vopnaburði,“ upplýsir Gunnar Víking.

Félagið fékk úthlutað húsnæði í Nauthólsvíkinni fyrir ári og luku félagsmenn nýverið við að gera húsið upp. Í kjölfar þess langar félagana nú að koma á laggirnar eigin víkingahátíð, ekki ólíkri þeirri sem haldin er árlega í Hafnarfirði. „Stefnan er að halda svipaða hátíð og hefur verið í Hafnarfirði á vegum Rimmugýgjar. Okkar félag hefur aldrei tekið þátt í hátíðinni í Hafnarfirði, enda eru þær sýningar á vegum félagsmanna Rimmugýgjar. Við teljum þó að það sé pláss fyrir fleiri hátíðir í þessum dúr og þá víðar um landið.“

Spurður út í vopnin sem Einherja-menn nota segir Gunnar Víking þau pöntuð að utan og að það þurfi sérstakt leyfi frá Ríkislögreglustjóra til að flytja inn slíka gripi. „Vopnin eru raunveruleg þótt þau séu bitlaus og það má ekki hver sem er flytja slíkt vopn inn í landið. Sverðin eru mjög þung og geta valdið skaða og þess vegna er mikilvægt að fólk læri að meðhöndla þau rétt. Það eru einnig vissar reglur sem þarf að fylgja; það er bannað að slá andstæðinginn í háls eða höfuð og alveg bannað að meiða.“

Gunnar Víking er, líkt og nafnið gefur til kynna, víkingur í húð og hár. Hann ólst upp í Bandaríkjunum og segir skólafélaga sína aldrei hafa kallað sig annað en „The Viking“ þegar hann var barn. „Þetta er mitt starf og það sem ég geri. Ég tók upp nafnið Víking fyrir nokkru og það er einnig bílnúmerið mitt. Ég hef alltaf haft mikinn áhuga á víkingum og Þór var hetjan mín þegar ég var lítill strákur. Það er líka skemmtilegt að segja frá því að mamma mín vildi skíra mig Víking Þór á sínum tíma en í staðinn var ég skírður í höfuðið á föðurafa mínum, Gunnari Sal Úrsus, sterkasta manni Íslands.“

Hægt er að kynna sér starf félagsins frekar á Facebook undir nafninu Einherjar The Vikings of Reykjavík.sara@frettabladid.is