Rihanna tekur lagið með kvalara sínum

Talið er að söngvarinn Chris Brown, fyrrverandi kærasti Rihönnu, komi fram í myndbandi hennar á næstunni. Það væri eðlilegt ef Brown hefði ekki gengið illa í skrokk á henni fyrir þremur árum.

Annar af upptökustjórum nýs lags Rihönnu, Birthday Cake, hefur látið hafa eftir sér að fljótlega verði gefið út myndband með laginu með mjög umdeildum og óvæntum breytingum. Upplýsingar hafa lekið út um að þessi breyting sé sú að fyrrum kærasti söngkonunnar, og einn umdeildasti maður heims um þessar mundir, Chris Brown komi til með að syngja lagið með henni en sögusagnir af endurupptöku sambands þeirra hafa tröllriðið öllu að undanförnu.

Flestir muna eflaust eftir dramatískum endi tæplega árs langs sambands þeirra. Það var að morgni 8.febrúar 2009 þegar parið var í bifreið Brown á leið heim úr fyrirpartýi Clive Davis fyrir Grammy verðlaunahátíðina sem fór fram viku síðar. Brown stöðvaði bílinn utan vegar þegar rifrildi blossaði upp milli parsins vegna SMS skeyta sem hann hafði þá fengið frá annari konu og báru með sér að hann ætti í framhjáhaldi. Þar beitti hann söngkonuna grófu líkamlegu ofbeldi, hótaði henni lífláti, hélt um háls hennar þar til hún missti meðvitund og skildi hana svo eftir lurkum lamin. Þegar lögreglu bar að garði var Brown horfinn á braut og Rihanna svo illa farin að færa þurfti hana á spítala, með bólgur í andliti, sprungna vör, blóðnasir og mikið marin. Þar að auki var hún með bitför á öllum líkamanum, þó aðallega á höndum og fingrum.

Rihanna lagði fram kæru á hendur Brown sem var fundinn sekur um líkamsárás og í kjölfarið var sett á hann nálgunarbann. Í júlí það sama ár gaf hann út myndband á netinu þar sem hann sagðist sjá eftir gerðum sínum og bað Rihönnu og alla aðdáendur sína afsökunar á hegðun sinni.

Í lok árs 2010 óskaði söngvarinn eftir því að nálgunarbanninu yrði aflétt og þar sem Rihanna mótmælti því ekki varð honum að ósk sinni þann 22.febrúar 2011.

Margir vilja meina að sambandið hafi hafist að nýju strax þá, þó Brown hafi verið í sambandi síðustu mánuði. Það er þó greinilegt að eitthvað er í gangi á milli þessara tveggja. Nú er bara að bíða og sjá hvort myndbandið komi til með að ljóstra upp um hvað það sé. tinnaros@frettabladid.is