Madonna leyfir söngleik

Bandaríska söngkonan Madonna hefur opnað á þann möguleika að lög hennar verði notuð í söngleik. Þetta kemur fram í viðtali við hana í breska blaðinu Daily Star.

Sænski söngflokkurinn Abba gaf svipað leyfi þegar söngleikurinn Mamma Mia! var gerður en hann sló eftirminnilega í gegn líkt og kvikmyndin sem gerð var eftir honum með Meryl Streep og Pierce Brosnan í aðalhlutverkum.

Madonna hefur ekki í hyggju að koma nálægt söngleiknum, hvorki sem leikstjóri né handritshöfundur. „Ég hef þegar gefið leyfi fyrir notkun á lögum mínum en ég mun ekki koma neitt nálægt söngleiknum. Ég hef lítinn áhuga á því," segir Madonna við Daily Star.