Stjörnu-sýning í Nokia-höllinni

Engin hörgull var á stórstjörnum þegar People‘s Choice Awards voru afhent í Nokia-höllinni í Los Angeles þrátt fyrir að helstu sigurvegarar kvöldsins hefðu verið víðsfjarri.

Bandaríska söngkonan Katy Perry stóð uppi sem sigurvegari á People‘s Choice Awards sem fóru fram á miðvikudagskvöld. Perry hlaut fimm verðlaun en ákvað að draga sig út úr verðlaunaafhendingunni á þriðjudagskvöld. Ástæðan var augljós, flutningabílar voru mættir að villu hennar og Russells Brand, fyrrum eiginmanns söngkonunnar, til að tæma hana en eins og komið hefur fram í fjölmiðlum skildu Brand og Perry eftir rúmlega tveggja ára hjónaband skömmu eftir jól.

Alls eru veitt fjörtíu verðlaun á People‘s Choice Awards. Og því óþarfi fara nákvæmlega ofaní saumana á hverjum einasta verðlaunaflokki en hátt í tuttugu milljón atkvæði bárust gegnum annað hvort net eða síma samkvæmt upplýsingum frá skipuleggjendum hátíðarinnar. Meðal annarra verðlaunahafa má nefna að Emma Stone fékk tvenn verðlaun, sem besta drama-og gamanleikkona, Johnny Depp var valinn leikari ársins og Adam Sandler var heiðraður fyrir gamanleik sinn þrátt fyrir að kvikmyndir hans í ár hafi verið rifnar á hol af gagnrýnendum. „En það sem mestu máli skiptir er að þið, áhorfendur, kunnið að meta verk mín,“ sagði Sandler. Þá var Morgan Freeman heiðraður fyrir framlag sitt til hvíta tjaldsins.

Í sjónvarpsflokknum skiptust verðlaunin nokkuð jafnt en gamanþátturinn How I Met Your Mother fékk tvenn verðlaun; Neil Patrick Harris var kosinn besti gamanleikarinn og þátturinn sjálfur besti grínþátturinn. Nina Dobrev úr Vampire Diaries var valin besta drama-leikkonan en Nathan Filion úr Serenity fékk sömu verðlaun í karlaflokki. Það var síðan Lea Michele sem var útnefnd besta gamanleikkonan í sjónvarpi fyrir frammistöðu sína í Glee. freyrgigja@fretttabladid.is