Skaupið kostaði 30 milljónir

Framleiðslukostnaður við Áramótaskaup Sjónvarpsins var þrjátíu milljónir samkvæmt upplýsingum frá Páli Magnússyni, Útvarpsstjóra. Gunnar Björn Guðmundsson leikstýrði því þriðja árið í röð en Skaupið þótti nokkuð umdeilt í ár; Sjálfstæðismenn kvörtuðu undan því á vefmiðlum og þá setti Eiður Guðnason, fyrrverandi ráðherra, fram harða gagnrýni á bloggsíðu sinni á brandara um útrás Íslendinga til Noregs en þar fannst honum voðaverkin í Útey vera höfð í flimtingum.

Páll segir þetta vera svipaðan kostnað og síðastliðin fimm ár en hann bendir á að uppsafnað áhorfa á frum-og endursýningar hafi verið um 87 prósent. „Markaðshlutdeildin náði hins vegar þeirri ótrúlegu mælingu 100 prósent. Sem sagt: allir Íslendingar sem á annað borð voru með kveikt á sjónvarpi á frumsýningartíma Gamlárskvöld voru að horfa á Skaupið,“ segir Páll sem er nokkuð viss um að þetta hljóti að vera heimsmet. „Að minnsta kosti ef horft er til landa sem hafa fleiri en eina sjónvarpsstöð.“ -fgg