Uppselt hálfu ári fyrir sýningu

Miðar á sérstakar miðnætursýningar The Dark Knight Rises, nýjustu Batman-myndarinnar, eru þegar orðnir uppseldir í Bandaríkjunum, um sex mánuðum áður en myndin kemur út 20. júlí.

Aðdáendur Batman eru greinilega æstir í að sjá þessa þriðju mynd leikstjórans Christophers Nolan um grímuklæddu ofurhetjuna því miðarnir á miðnætursýningar í New York, Los Angeles og San Francisco ruku út á örskammri stundu. Ekki er vitað hvort einhverjum sýningum verður bætt við en ljóst er að eftirspurnin er fyrir hendi og rúmlega það.

Leikstjórinn Nolan hefur viðurkennt að hafa fundið fyrir miklum utanaðkomandi þrýstingi við gerð myndarinnar. „Ég held að þetta sé góður þrýstingur vegna þess að þessar myndir og væntingar áhorfendanna eiga það skilið,“ sagði hann.

Tom Hardy leikur illmennið Bane í The Dark Knigt Rises. Með önnur hlutverk fara Christian Bale sem Batman, Anne Hathaway, Joseph Gordon-Levitt, Marion Cotillard, Michael Caine og Gary Oldman.