Spielberg gerir dekkri myndir

Steven Spielberg hefur viðurkennt að kvikmyndir sínar hafi orðið dekkri eftir árásirnar á Tvíburaturnana 2001. Spielberg hefur í gegnum árin verið þekktur fyrir frekar fjölskylduvænt bíó með E.T, Indiana Jones og Jurassic Park í broddi fylkingar.

Í viðtali við breska blaðiðIndependent kemur fram að Spielberg hafi fundist hann verða að breyta um stíl eftir árásirnar þar sem hátt í þrjú þúsund manns féllu.

„9/11 breytti mér og þessir atburðir breyttu heiminum. Myndir mínar urðu dekkri.“ Spielberg nefnir þar sérstaklega tvær myndir, annars vegar Minority Report og hins vegar War of the Worlds. Báðar skörtuðu þær Tom Cruise í aðalhlutverkum.

„Minority Report var mjög dökk sýn á framtíðina á meðan War of the Worlds talaði beint inn í atburðina. Hún átti ekki að gera það en útkoman varð bara þannig.“ -fgg