Safna sögum af litlum systrum og bræðrum

Æfingar fyrir leikverkið Skrímslið litla systir mín standa nú yfir í Norræna húsinu, en verkið verður sýnt þar í febrúar. Í tengslum við sýninguna safna þær Helga Arnalds, höfundur og túlkandi, og Charlotte Böving leikstjóri reynslusögum barna af því að eignast lítið systkini.

„Kveikjan að þessu var sonur minn, þegar hann var að eignast sína litlu systur. Um það leyti sem hún var að fæðast sagði hann mér sögu af einhverjum sem var ekki hann, heldur einhver allt annar. Sá hafði eignast litla systur sem var skrímsli og át foreldra sína. Ég fann strax að þetta var hans leið til að takast á við sínar tilfinningar, að fara inn í eitthvert ævintýri," segir Helga Arnalds, leikkona og höfundur sýningarinnar Skrímslið litla systir mín. Verkið verður sýnt í Norræna húsinu í febrúar.

Í tengslum við sýninguna eru þær Helga og Charlotte Böving, leikstjóri sýningarinnar, nú að safna sögum af því hvernig börn takast á við þann stórviðburð að eignast lítið systkini.

„Þegar við byrjuðum að vinna í sýningunni og fórum að ræða málin komumst við að því að allir kunna skemmtilegar sögur af þessu tagi. Þá datt okkur í hug að safna þeim á einn stað og opna þannig fyrir umræðuna. Það er dálítið tabú að vera svona afbrýðisamur, eins og börn verða oft þegar þau eignast lítið systkini. En þetta er ofsalega sterk tilfinning. Börnin fá aðallega spurningar eins og: „er litla systir ekki fín?" og „er ekki gaman að vera stóri bróðir?" Það er lítið verið að gefa þeirra tilfinningum pláss." Sögurnar má senda inn á Facebook-síðu Leikhússins 10 fingur.

Aðalsöguhetja verksins er myrkfælinn strákur sem hefur nýlega eignast litla systur. Hann kemst að því að hún er ekkert venjulegt barn heldur skrímsli sem ætlar að éta mömmu hans upp til agna og kannski bara allan heiminn. Til að bjarga mömmu sinni og öllum heiminum frá litla skrímslinu, þarf hann að ferðast gegnum skuggalega skóga, um dimmar drekaslóðir, alla leið út á heimsenda. Á leiðinni lærir hann að elska litlu systur sína. „Þetta fjallar líka um skrímslin inni í okkur, hvernig þau verða til og hvernig þau stækka alltaf í myrkrinu, ef við tölum ekki um þau," segir Helga.

Leikverkið er einhvers staðar á mörkum leikrits, brúðuleikhúss og skuggamyndasýningar. „Ég býð börnunum inn í risapappírsveröld, sem ég ríf, bleyti, mála á og breyti. Stundum eru systkinin litlir bréfmiðar, stundum teiknaðar myndir og stundum skuggar. Ég er miðlarinn, stundum eins og sögumaður og stundum eins og persóna í sögunni."

Tónlistin leikur stórt hlutverk í verkinu, en henni lýsir Helga sem ævintýralegri, náttúrulegri og frumstæðri. Eivör Pálsdóttir vinnur tónlistina og notar hljóðfæri sem Páll Guðmundsson frá Húsafelli bjó til sérstaklega fyrir sýninguna.

Eftir leikritið verður börnum boðið að taka þátt í listasmiðju, undir handleiðslu Helgu og Evu Signýjar, þar sem þau fá að skapa sín eigin skrímsli úr pappírnum sem Helga notar í sýningunni.

Skrímslið litla systir mín verður frumsýnt 4. febrúar. Sýningin er fyrir alla fjölskylduna, fullorðna og börn frá fjögurra ára aldri.

holmfridur@frettabladid.is