Tímamótum fagnað á Kex

Spurningaþátturinn Nei hættu nú alveg í umsjón Vilhelms Antons Jónssonar hefur átt nokkrum vinsældum að fagna á Rás 2 upp á síðkastið.

Nokkur tímamót verða í sögu þáttarins á sunnudag þegar hundraðasti þátturinn verður sendur út. Venjulega hafa þættirnir verið í beinni útsendingu en í þetta skiptið verður brugðið út af vananum og var þátturinn tekinn upp á Kex-hosteli í gærkvöldi með fullan sal af áhorfendum að fylgjast með.

Var þessi háttur ekki hafður á fyrir tilviljun heldur gafst aðdáendum þáttarins færi á að kjósa um það á Facebook hvernig haldið yrði upp á tímamótin og varð upptaka á Kex-hosteli fyrir valinu. Ekki verður ljóstrað upp um það hér hverjir voru gestir þáttarins en fyrirliðarnir, leikararnir Anna Svava Knútsdóttir og Vignir Rafn Valþórsson, voru á sínum stað og vöktu mikla lukku.