Umdeildur norskur grínisti leikur Georg Bjarnfreðarson

Hinn umdeildi norski grínisti Otto Jespersen leikur Georg Bjarnfreðarson í norsku útgáfunni af Næturvaktinni. Þættirnir hafa hlotið nafnið Nattskiftet og fara tökurnar fram í smábænum Minnesund þar sem 488 manns búa. Einni tökuviku af níu er nú lokið.

Otto Jespersen, sem er 58 ára, er einn frægasti grínisti Norðmanna og er ákaflega umdeildur heima fyrir. Hann var meðal annars skammaður af fyrrverandi forsætisráðherra landsins, Kjell Magne Bondevik, en Jespersen hafði lyfjanotkun forsætisráðherrans í flimtingum í uppistandi sínu og gerði óvinsældir ráðherrans að umtalsefni. Þá er Jesperson sérstaklega illa liðinn af gyðingum en þeir telja hann hafa sýnt skýr merki um gyðingahatur þegar hann syrgði allar þær lýs og flær sem fórust í helförinni. Jespersen er almennt talinn einn ríkasti skemmtikraftur landsins, hann er í sambúð með Ingrid Laurentzen, fyrrverandi balletdansara og hefur verið kynnir í sjónvarpsþáttunum Rikets røst, norskum spéspegli. Jespersen leikur aðalhlutverkið í norsku kvikmyndinni TrollHunter sem notið hefur mikilla vinsælda.

Hlutverk Ólafs Ragnars verður í höndum hins 35 ára John Brungot en sá er einnig ákaflega þekktur í heimalandi sínu. Hann var meðal annars kynnir í raunveruleikaþáttaröðinni Norske Talenter. Hlutverk Daníels leikur síðan hinn 29 ára gamli Mats Eldøen. Hann er ef til vill minnst þekktur af þeim þremur en lék þó stórt hlutverk í stórmyndinni Max Manus, einni dýrustu kvikmynd í sögu Noregs.

Mads Løken, einn af þremur handritshöfundum þáttanna, sagði í samtali við Fréttablaðið að einhverjar breytingar yrðu á handritinu, þetta væri ekki nákvæm endurgerð.

„Maður hefur það á tilfinningunni í íslensku þáttunum að allir þekki alla á Íslandi þannig að við urðum aðeins að breyta þeim köflum,“ segir Mads. Fréttablaðið hafði einnig samband við Trond Kvernstrøm, framkvæmdastjóra framleiðslufyrirtækisins Monster, sem framleiðir þættina. Hann taldi þetta vera mjög stóra framleiðslu á norska vísu.

„Þetta verða tíu þættir og þeir verða væntanlega frumsýndir annað hvort í haust eða næsta vor,“ segir Trond sem vísaði að öðru leyti á fulltrúa TV 2. freyrgigja@frettabladid.is