Brynja ætlar að fela tilvitnanir í hverjum þætti Eurovision

Söngvakeppni Sjónvarpsins, forkeppni Eurovision, hefur göngu sína um næstu helgi. Þetta árið er það sjónvarpskonan Brynja Þorgeirsdóttir sem heldur um stjórnartaumana í þremur undanþáttum og sjálfum úrslitunum í Sjónvarpinu.

Eins og Fréttablaðið hefur greint frá leggur Brynja nú stund á nám í bókmenntafræði við Háskóla Íslands. Hún hefur ákveðið að flétta saman þessi tvö starfssvið sín með laufléttum samkvæmisleik. Brynja hefur sett sér það markmið að koma að í hverjum þætti tilvitnun úr bókum eða vísanir í þekkt verk.

Forvitnilegt verður að sjá hvernig Brynju tekst til með þetta og hvort áhorfendur verði varir við þessa nýbreytni.