Richards fór í augnaðgerð

Rollingurinn Keith Richards gekkst nýverið undir laser-aðgerð á auga til að lagfæra sjón sína. Að sögn talsmanns hans gekk aðgerðin vel og er hann á batavegi. Richards, sem er 68 ára, er þekktur fyrir sukksamt líferni sitt og ætti því engum að koma á óvart að sjón hans sé aðeins farin að daprast.

Rolling Stones fagnar fimmtíu ára afmæli sínu á árinu. Ekki er víst hvort tónleikaferð um heiminn verði farin, enda hafa þeir Richards og söngvarinn Mick Jagger rifist eins og hundur og köttur að undanförnu.