Ragnar í Pain of Salvation

Tónlistarmaðurinn Ragnar Sólberg, úr hljómsveitinni Sign, hefur gengið til liðs við sænsku progg-þungarokkhljómsveitina Pain of Salvation, sem er gríðarlega stórt nafn í heimi þungarokksins.

Ragnar er því á leiðinni í tveggja mánaða tónleikaferðalag um Evrópu með hljómsveitinni, sem hefst 10. febrúar í Glasgow í Skotlandi. Hann var valinn úr tæplega hundrað manna hópi umsækjenda og samkvæmt yfirlýsingu á heimasíðu sveitarinnar er gríðarleg ánægja með valið. „Við erum handvissir um að Ragnar hefur það sem þarf til að sparka í rassgötin á ykkur á væntanlegum tónleikum, fyrstu æfingadagarnir undirstrika það,“ segir í yfirlýsingunni. „Hann er stórkostlegur gítarleikari, framúrskarandi söngvari og hann kann að nota hæfileikana til að rokka á sviði. Svo er hann æðisleg manneskja!“

Ekki náðist í Ragnar í gær, en í orðsendingu til aðdáenda Pain of Salvation á vefsíðu hljómsveitarinnar segist hann vera gríðarlega þakklátur og spenntur fyrir væntanlegu tónleikaferðalagi. Þá segir hann það vera ótrúleg forréttindi að deila sviði með einni af uppáhaldshljómsveitunum hans. „Ég get ekki beðið eftir að byrja að rokka með tónlistinni sem við elskum öll svo mikið,“ skrifar hann. - afb