Verðlaunatímabilið að hefjast

Fyrstu mánuðir nýs árs eru sælkeraveisla fyrir unnendur verðlaunamynda og strax um helgina verða frumsýndar tvær myndir sem hafa verið nefndar sem hugsanlegir kandídatar í Óskarsverðlaunakapphlaupinu.

Annars vegar er um að ræða Tinker Tailor Soldier Spy sem skartar mörgum af helstu leikurum Breta í aðalhlutverki, meðal annars Colin Firth, Gary Oldman, John Hurt og Tom Hardy, sumsé einvalalið. Leikstjóri er hinn sænski Tomas Alfredson sem gerði hina eftirminnilegu vampírumynd Låt den rätte komma in fyrir þremur árum. Alfredson er á öðrum slóðum í þessari mynd því Tinker Tailor Soldier Spy segir frá njósnaranum George Smiley sem er kallaður aftur til starfa eftir að hafa verið sestur í helgan stein. Hlutverk Smiley er að afhjúpa rússneskan njósnara innan MI6.

Hin myndin er My Week with Marilyn og hún er reyndar líka bresk, leikstýrð af Simon Curtis og skartar Kenneth Branagh, Judi Dench, Emmu Watson og Michelle Williams en Williams leikur sjálfa Marilyn Monroe. Myndin segir frá því þegar Monroe kom til Bretlands til að leika í kvikmyndinni The Prince and the Showgirl 1956 með Sir Laurence Oliver. Hún var þá nýgift leikritaskáldinu Arthur Miller sem fylgdi henni á tökustað en varð síðan að snúa aftur heim. Monroe leitaði þá til Colin Clark, sem var óbreyttur aðstoðarmaður á tökustað, og hann sýndi henni dæmigerðan breskan lífstíl og hjálpaði henni að flýja stjörnulífernið um stundarsakir.- fgg