Ingó týndist en fer ekki á taugum

„Hann náði einhvern veginn ekki í gegn. Hann fékk ekki þá útvarpsspilun sem hann hefur fengið oft áður og týndist svolítið,“ segir Eiður Arnarsson hjá Senu um fyrstu sólóplötu Ingólfs Þórarinssonar, Ingó, sem kom út fyrir jólin á vegum fyrirtækisins.

Samkvæmt upplýsingum Fréttablaðsins seldust innan við eitt þúsund eintök af henni, sem er óvenju lítið þegar hinn vinsæli Ingó er annars vegar. „Við vorum að vonast eftir meiri sölu. Við bjuggumst ekki við neinu í líkingu við Veðurguða-plötuna en vorum að vonast eftir um þrjú þúsund seldum plötum,“ segir Eiður. Plata Ingós og Veðurguðanna sem kom út 2009 hefur selst í um fimm þúsund eintökum. Þar hjálpuðu ótrúlegar vinsældir lagsins Bahama sem kom út árið áður.

Ingó sjálfur hefur enga eina skýringu á reiðum höndum. „Maður veit víst ekki neitt, það er það eina sem maður veit,“ segir hann. „Hún fékk lélega dóma á nokkrum stöðum, ég veit ekki hvort það hefur haft áhrif. Svo var þetta kannski ekki eins krakkamiðað og á fyrri plötunni. Náði ekki til eins víðs hóps.“

Sjálfur segist hann vera ánægður með plötuna og vonast til að fleira fólk gefi henni gaum. „Maður fer ekkert á taugum þó að platan seljist illa,“ segir hann og er hvergi af baki dottinn. - fb