Vinsælustu forsíðustúlkur ársins 2011

Árlega gerir Audit Bureau of Circulations í Bretlandi könnun hvaða tímarit seldust best á árinu og þá hvaða forsíður vöktu áhuga flestra lesenda árið 2011. Það eru leikkonurnar Sarah Jessica Parker og Jennifer Aniston sem prýddu forsíður mest seldu tímarita ársins 2011.

Jennifer Aniston var framan á júlíútgáfu breska tískutímaritsins Marie Claire sem seldist mjög vel sem og nóvember-tölublaði ELLE en áhugi lesenda á leikkonunni virðist hafa orðið meiri eftir að hún byrjaði með leikaranum Justin Theroux á vormánuðum 2011.

Parker hins vegar kom janúarútgáfu Elle í metsölu sem og aðalblaði ársins, ágústútgáfu tískubiblíunnar Vogue, sem er allajafna mest selda blað ársins.

Nýstirnið á þessum lista er leikkonan unga Mila Kunis en hún var á forsíðu karlatímaritsins GQ í ágúst í fyrra og seldist það blað í 205 þúsund eintökum sem er met hjá blaðinu. Kunis sló í gegn með leik sínum í Black Swan árið 2010.

Vinsældir Kim Kardashian virðast hins vegar vera að dala því þau blöð sem höfðu raunveruleikastjörnuna á forsíðunni stóðu ekki undir væntingum en árið 2010 var hún vinsælasta forsíðustúlkan.