Jared Leto verst klæddi karlmaður ársins 2011

Leikarinn og söngvarinn Jared Leto var kosinn verst klæddi karlmaður ársins 2011. Samkvæmt tímaritinu GQ þykir Leto hafa skapað nýjar hæðir í ósmekklegheitum á síðasta ári en stíll hans einkennist af síðum skyrtum, pilsi yfir buxur, lökkuðum nöglum og svörtum augnblýanti.

Tímaritið segir að Leto floppi algerlega í tilraunum sínum til að vera smart. „Það er ekki það að hann sé ekki að reyna. Söngvarinn í 30 Seconds to Mars reynir alltof mikið. Okkur finnst þú fínn Leto og þú ert allavega góður í einni af vinnunum þínum en gerðu það fyrir okkur, hættu að klæða þig eins og hálfviti," segir tímaritið en Leto hefur undanfarin ár dregið sig í hlé frá kvikmyndabransanum og farið á fullt í tónlistina en hann er duglegur að dúkka upp á rauða dreglinum og á tískuviðburðum í ýmsum múnderingum.

Leto sló í gegn í sjónvarpsþáttunum „My So Called Life" og hefur leikið í myndum á borð við „Requiem for a Dream" og „American Psycho".

Nú á hljómsveitin 30 Seconds to Mars hug hans allan en hana stofnaði hann ásamt bróður sínum árið 1998.

Smellið á myndina til að fletta yfir óborganlegt myndasafn af klæðnaði Leto á síðasta ári.