Brynhildur Ólafs stýrir Eddunni

Alls bárust 98 verk til Eddunnar, íslensku sjónvarps-og kvikmyndaverðlaunanna. Þetta eru ögn fleiri verk en bárust í fyrra að sögn Brynhildar Ólafsdóttur, nýráðins framkvæmdastjóra Eddunnar. Brynhildur var um árabil fréttamaður á Stöð 2, var síðan upplýsingafulltrúi hjá Saga Capital en hefur að undanförnu unnið fyrir framleiðslufyrirtækið Saga Film og verið leiðsögumaður.

Brynhildur, sem tók við starfinu í síðustu viku, segir þar mestu muna um sjónvarpsverk. Í fyrra bárust 36 verk í þeim flokki en í ár eru þau 63 eða um 75 prósentum fleiri.

„Þarna er auðvitað um að ræða bæði leikið efni og svo alla aðra sjónvarpsþætti, lífsstílsþætti, frétta- og viðtalsþætti, skemmtiþætti og annað í þeim dúr,“ segir Brynhildur en nú taka fjórar valnefndir til starfa sem velja það besta úr hverjum flokki fyrir sig.

Þær skila sínum tilnefningum 3. febrúar en verðlaunin sjálf verða afhent rúmum hálfum mánuði síðar, laugardaginn 18. febrúar í Gamla bíói í beinni útsendingu Stöðvar 2.

Að sögn Brynhildar berjast níu kvikmyndir um hylli valnefndarinnar. Aðeins þrjár hljóta hins vegar náð fyrir augum nefndarinnar og því ljóst að baráttan um þá tilnefningu verður ansi hörð.

„Reglurnar eru þær að ef myndirnar eru fleiri en tíu þá eru fimm tilnefndar. Ef þær eru hins vegar færri þá eru þrjár tilnefndar,“ útskýrir Brynhildur. -fgg