Blur í hljóðver eftir Brits

Hin goðsagnakennda hljómsveit Blur, með fyrrum Kaffibarseigandann Damon Albarn fremstan í flokki, mun væntanlega koma fram á Brit-verðlaununum í næsta mánuði. Talið er líklegt að hljómsveitin muni í kjölfarið bregða sér í hljóðver.

Blur hefur ekki verið starfandi síðan 2003 fyrir utan litla tónleikaröð 2009. Þeir munu hins vegar taka við heiðursverðlaunum Brit og í kjölfarið leika nokkra gamla og góða Blur-slagara.

„Það verður mjög skondið að spila þessi lög á ný,“ hefur tónlistartímaritið NME eftir gítarleikaranum Graham Coxon. Hann bætti því við að meðlimir hljómsveitarinnar hafi verið að hittast af og til en ef þeir ætluðu sér að gera eitthvað þá yrðu þeir að taka hlutina fastari tökum. „Ef Blur gerir eitthvað í hljóðveri þá verður það að vera flott og metnaðarfullt. Annað sæmir ekki þessari hljómsveit,“ segir Coxon.

Alex James, sem plokkar bassann í Blur, sagði að þeir myndu mögulega fara í hljóðver. En hugsanlega yrði það ekki meira en bara smáskífa. „Er breiðskífa ennþá til? Og þarf hún alltaf að koma út með tólf lögum?“