Samdi við eina af virtustu umboðsstofum Hollywood

Það er spennandi ár fram undan hjá tónlistarmanninum Jóhanni Jóhannsyni. Hann verður viðstaddur kvikmyndahátíðina Sundance um næstu helgi.

Tónlistarmaðurinn Jóhann Jóhannsson hefur nýlokið við að semja tónlist við bandarísku kvikmyndina For Ellen sem verður heimsfrumsýnd á Sundance-hátíðinni í Utah um næstu helgi. Þar verður Jóhann einmitt viðstaddur.

Með aðalhlutverkin fara Paul Dano, sem lék annað aðalhlutverkanna í The Good Heart eftir Dag Kára, og Jon Heder sem sló í gegn í gamanmyndinni Napolean Dynamite.

Jóhann skrifaði nýverið undir samning við eina virtustu umboðsskrifstofu kvikmyndatónskálda í Hollywood; Gorfein/Schwartz. Mörg af helstu kvikmyndatónskáldum heims eru á mála hjá stofunni, þar á meðal John Williams, Thomas Newman, James Newton Howard og James Horner. Tónskáld á vegum skrifstofunnar hafa samtals verið tilnefnd 128 sinnum til Óskarsverðlauna.

„Þetta er frábær skrifstofa. Þeir eru með mjög góð sambönd inn í kvikmyndaheiminn þarna vestur frá, þannig að þetta er gott tækifæri fyrir mig. Þeir eru í tengslum við verkefni sem eru stærri og umfangsmeiri,“ segir Jóhann, sem hefur að meðaltali gert tónlist við tvær kvikmyndir eða heimildarmyndir á ári undanfarin ár. „Þetta er nýtt skref. Það er búið að vera nóg að gera á undanförnum árum hjá mér en þetta er næsta þrep.“

Tvær heimildarmyndir eru í bígerð hjá Jóhanni. Fyrst er það Free the Mind eftir danska leikstjórann Phie Ambo og eftir það tekur við The Man Who Saved the World. Eins og kom fram í Fréttablaðinu í gær verður frumflutt 3. febrúar í Winnipeg tónverk Jóhanns, A Prayer to the Dynamo. Stjórnandi Nýju tónlistarhátíðarinnar í Winnipeg pantaði verkið hjá Jóhanni og byrjaði hann að semja það síðasta vor. „Þetta er frábært tækifæri fyrir mig. Þetta er stærsta hljómsveitarverk sem ég hef samið hingað til,“ segir hann og stefnir á að taka það upp seinna á árinu með útgáfu í huga.

Í júní kemur svo út endurútgáfa Jóhanns af „Protest“ úr óperunni Satyagraha eftir tónskáldið Philip Glass. Hildur Guðnadóttir syngur í laginu sem er hluti af heiðursplötu með endurútgáfum Glass í tilefni 75 ára afmælis hans.

Þónokkrir tónleikar eru fram undan hjá Jóhanni, þar af þrennir í N-Ameríku. Þeir fyrstu fara fram í Vetrargarði World Financial Center í New York þar sem Jóhann mun flytja tónlist sína við kvikmyndina The Miner‘s Hymns. Síðustu tónleikarnir fara fram í Los Angeles 8. febrúar þar sem Jóhann kemur fram með Formalist kvartettnum. Í maí heldur Jóhann svo í Evróputúr með Dustin O‘ Halloran og Hauschka. Þeir eru allir á mála hjá 130701 útgáfunni sem heyrir undir Fat Cat. freyr@frettabladid.is