Wayne Rooney og fleiri stjörnur slegnar yfir andláti dívunnar

Fréttasíður og samskiptavefir loguðu eftir að fréttir bárust um andlát Whitney Houston í nótt. Stjörnur á borð við Mariuh Carey og Rihönnu voru slegnar af fréttunum og vottuðu fjölskyldu Whitney samúð sína á Twitter.

Fréttir um andlát Whitney fóru að berast upp úr klukkan eitt að íslenskum tíma. Sjónvarpsmaðurinn Ryan Seacrest var staddur á æfingu fyrir Grammy verðlaunin og skrifaði jafnóðum á Twitter síðu sína að allir viðstaddir væru orðlausir vegna fregnanna.

Í kjölfarið bárust kveðjur frá mörgum helstu stjörnum heims. Söngkonan Mariah Carey sagðist vera í tárum vegna fréttana af andlátri góðrar vinkonu og sendi kveðju til fjölskyldu Whitney í færslu á Twitter en Mariah söng dúettinn When you Believe með Whitney fyrir bíómyndina Prince of Egypt árið 1998.

Fleiri stjönur á borð við Katy Perry, Justin Bieber, Rihönnu, Simon Cowell og jafnvel Wayne Rooney vottuðu samúð sína á Twitter í nótt og var öllum verulega brugðið vegna fregnanna. Þá voru flestir sammála um að ein magnaðasta söngrödd sögunnar hefði nú hljóðnað langt um aldur fram. Margir vitnuðu í lög með Whitney til dæmis hið ódauðlega I will always love you.