Vicente del Bosque verður með Spán á HM 2014

Vicente del Bosque hefur framlengt samningi sínum við spænska knattspyrnusambandið um tvö ár. Þar með mun hinn sigursæli landsliðsþjálfari heims – og Evrópumeistaraliðs Spánar þjálfa liðið fram yfir heimsmeistarakeppnina sem fram fer í Brasilíu árið 2014.

Samkvæmt frétt spænska íþróttadagblaðsins Marca, skrifaði Vicente del Bosque undir samninginn eftir 1-1 jafnteflisleik Spánverja gegn Ítalíu í fyrstu umferð Evrópumótsins í Gdansk í Póllandi.

Vicente del Bosque lék á sínum tíma með Real Madrid og hann var einnig þjálfari stórliðsins um tíma.

Hann tók við spænska liðinu árið 2008 eftir að Spánverjar höfðu fagnað sigri á EM undir stjórn Luis Aragones. Spánverjar sigruðu á HM 2010 í Suður-Afríku undir stjórn Vicente del Bosque og ef liðinu tekst að vinna EM í ár er það í fyrsta sinn sem sama þjóð sigrar á þremur stórmótum í röð.

Spánverjar mæta Króatíu í lokaumferð C-riðilsins á morgun, mánudag en liðið vann Írland 4-0 í 2. umferð en gerði 1-1 jafntefli við Ítalíu í fyrstu umferð.