Bauð upp á pönnsur

Anna Kristjánsdóttir, vélfræðingur hjá Orkuveitu Reykjavíkur, varð sextug föstudaginn 30. desember. Hún er ekkert fyrir að leigja sali undir stórfagnaði heldur hélt upp á afmælið heima og steikti pönnukökur ofan í gesti.

„Þetta var bara létt og huggulegt. Ég þurfti reyndar að sýna kisunum mínum smá ruddaskap og loka þær inni í herbergi á meðan, en þær sýndu því skilning blessaðar," segir Anna brosandi. „Annars er lítið hægt að gera í öllum þessum snjó, ég leggst kannski bara í ferðalög í sumar og tek þetta betur út þá," bætir hún við en segist annars ekki vön að halda sérstaklega upp á afmælisdaginn sinn.

Hún hafi haldið upp á tvítugs- og þrítugsafmælin en svo hafi orðið hlé á afmælisveisluhaldi. „Ég á alveg eftir að halda upp á fertugs- og fimmtugsafmælið, ætli ég geri það ekki bara á sjötugsafmælinu og haldi upp á eftirlaunin í leiðinni," segir hún glettin.

En hvernig tilfinning er að standa á sextugu?

„Það leggst bara vel í mig. Ég hef nú verið að stríða einum jafnaldra mínum og kalla hann Steina „gamla" síðasta hálfa árið. Honum finnst líka skelfilegt að þurfa að mæta í vinnu með „gömlu kellingunni" á nýja árinu," segir Anna hlæjandi en bætir svo við að auðvitað sé ánægjulegt að ná þessum aldri.

„Það eru ekki allir svo lánsamir og ég þakka fyrir hvert ár. Þetta er líka spurning um að halda heilsunni sem lengst og hún er sem betur fer í lagi ennþá."

heida@frettabladid.is