Aðstoðarkona eins og þræll

Poppstjarnan Lady Gaga hefur verið kærð af fyrrverandi aðstoðarkonu sinni, Jennifer O'Neil, sem segir Gaga hafa komið fram við sig eins og þræl. Söngkonan þvertekur fyrir að sakirnar séu sannar, en Jennifer segir hana skulda sér laun fyrir 7.168 yfirvinnustundir.

Meðal þess sem Jennifer tiltekur í kærunni er að hún hafi ávallt þurft að vera tilbúin með handklæði fyrir söngkonuna eftir sturtu og að Gaga hafi notað sig sem mannlega vekjaraklukku. Hún segir dagskrána hafa verið svo stífa að hún hafi með engu móti getað tekið sér hlé í vinnunni og stundum hafi hún ekki haft tíma til að sofa.

Lady Gaga er sá kvenkyns tónlistarmaður sem þénaði mest á árinu 2011, en tekjur hennar af tónlistinni voru hvorki meira né minna en 11 milljarðar íslenskra króna. Hún virðist ekki ætla að láta kæruna á sig fá, en líklegt þykir að hún verði tekin fyrir hjá dómstólum snemma á nýju ári.