Systkini saman með þátt á FM957

"Eins og systkini eiga til þá erum við ekki alltaf sammála en við höfum alltaf náð vel saman og núna verðum við í beinni alla laugardaga á FM957 frá klukkan 10 til 13," segir Kristján Ingi Gunnarsson útvarpsmaður um útvarpsþátt hans og systur hans, Ósk, sem er nýflutt frá London þar sem að hún vann að ýmsum viðburðum, en hún hefur komið að skiplagningu á mörgum af stærstu tónlistarhátíðum í Evrópu og er núna á fullu í vinnu fyrir Iceland Airwaves.

Reynslubolti

"Ég er búinn að vera í vinnu á FM957 síðustu ár, bæði í morgunþáttum og svo um helgar. Var líka um tíma uppi á Rúv og á gamla Popptíví sem nú er að fara aftur af stað. Hef unnið samfleytt hjá 365 í 7 ár núna á útvarpssviðinu. Við fórum í viðræður um að byrja með nýjan þátt á FM og eitt leiddi af öðru. Við erum mjög spennt og það verður bara gaman að prófa að vinna sem systur sinni.

Friðrik Dór mætir í viðtal í dag

"Við ætlum fyrst og fremst að skemmta okkur, við tökum á fréttum vikunnar með öðruvísi hætti. Heyrum í alnafna þess sem var mikið í fréttum í vikunni og fáum komment frá honum. Spyrjum doktorinn, læknirinn okkar veit allt manna best. Í fyrsta þætti spyrjum við, er hægt að deyja úr leiðindum? Skorum á hvort annað að hringja á einhvern ákveðin stað og tala lagatexta. Finnum skemmtilegar fréttir úr fortíðinni ásamt því að Ósk tekur hádegisfréttirnar á færeysku, allir vita að færeyska er fyndin. Kolamarkaðurinn verður fastur liður hjá okkur en hlustendur hringja inn og selja selja sitt dót, Barnaland í beinni. Enska eftirherman Darren Farley-the voice of football er að vinna með okkur en hann hermir eftir leikmanni eða þjálfara úr ensku úrvalsdeildinni óaðfnnanlega. Veljum Rabbabara vikunnar og svona mætti lengi telja. Við fáum alltaf til okkar tónlistarmann vikunnar, fyrstur í röðinni er Friðrik Dór sem vinnur að nýrri plötu. Hann fær sér kaffi og spjallar við okkur um nýju plötuna og allt á milli himins og jarðar ásamt því að taka flott kover lag. Við erum spennt fyrir þessu enda mjög gaman að vinna í útvarpi," segir Kristján Ingi að lokum.

Þáttur systkinanna er á dagskrá FM957 laugardaga 10:00 - 13:00.