Inga komin á Íslenska barinn

Inga á Nasa eins og við þekkjum hana er hvergi nær hætt í bransanum þrátt fyrir að hafa kvatt Nasa fyrir stuttu.



"Mér hefur lengi þótt vænt um þennan stað – enda horft hérna beint yfir af Nasa í mörg ár. Svo kom ég alltaf hingað til að fá mér besta salatið í bænum, Ungfrú Ísland," segir Inga á Nasa, eins og hún er enn kölluð þrátt fyrir að Nasa hafi nú verið lokað sem aðaltónleika- og ballstað Íslendinga, en hún hefur nú tekið við rekstri Íslenska barsins.

Íslenski barinn er í Pósthússtrætinu, í hjarta borgarinnar, en Inga vinnur nú hörðum höndum að því að fínpússa staðinn, laga vinnuaðstöðuna og gera hlutina að sínum eins og henni einni er lagið. Hún stefnir að því að standa ­vaktirnar sjálf eins og hún var þekkt fyrir á Nasa.

"Við ætlum að leggja upp úr því að fólki líði vel hérna og drífi sig ekki heim þó það sé búið að borða heldur færi sig yfir á barinn, kjafti við barþjóninn og slaki á," segir Inga spennt fyrir verkefninu. Þess má geta að Íslenski barinn á marga góða fastakúnna. Þar má nefna Hugleik Dagsson, Björn Jörund, Munda fatahönnuð og Helga Seljan.