Friðrik mætti með mömmu sína á Bessastaði

„Þetta er miklu meira en við bjuggumst við," segir söngvarinn Friðrik Ómar.

Rúmlega sautján milljónir króna söfnuðust á samstöðutónleikum hans og Jógvans Hansen í Hörpunni í nóvember vegna óveðursins sem gekk yfir Færeyjar í nóvember í fyrra. Tónleikarnir voru sýndir í Sjónvarpinu og þeim útvarpað á Rás 2 og á meðan voru landsmenn hvattir til að leggja söfnuninni lið.

Friðrik Ómar, Jógvan og Ólafur Ragnar Grímsson, forseti Íslands, afhentu formanni Björgunarsveitarinnar í Færeyjum upphæðina í pönnukökuboði á Bessastöðum í gær. „Þetta var bara mjög notalegt. Það var vel tekið á móti öllum og allt saman afskaplega flott," segir Friðrik Ómar, sem var að koma á Bessastaði í fyrsta sinn. Hann hitti ekki Dorrit Moussaieff eins og hann hafði vonast eftir en Ólafur Ragnar var „alveg eldhress". „Hann stillti okkur hérna upp í hljómsveitinni eins og hann væri þaulvanur rótari," segir hann, ánægður með forsetann. „Hann sá um allt væri á réttum stað og það var greinilegt að hann hafði gert þetta áður."

Friðrik Ómar og Jógvan sungu nokkur lög bæði á íslensku og færeysku við góðar undirtektir. Á meðal gesta var móðir Friðriks Ómars og var hún að vonum ánægð að koma á Bessastaði. „Það var gaman að fá hana. Hún var óvænt í borginni," sagði Dalvíkingurinn knái. - fb