Hestamenn ríða í gegnum miðbæinn

Dagana 29. mars – 1. apríl verða Hestadagar í Reykjavík. Þar fá borgarbúar gott tækifæri til að kynnast íslenska hestinum. Á laugardaginn munu hestar og hestamenn verða áberandi í miðbænum og í við Ráðhúsið í Reykjavík verður margt skemmtilegt í boði fyrir alla fjölskylduna.

Boðið verður upp á hestateymingar við Ráðhúsið, fyrirlestra af ýmsum toga um hestinn, sögu hans og atferli. Línudans verður kynntur og gestum og gangandi boðið að læra nokkur spor.

Dagskráin í ráðhúsinu endar svo á því að Helgi Björns tekur nokkur vel valin lög. Um kvöldið halda áhugasamir svo á einstaka töltkeppni í Skautahöllinni í Laugardal, þar sem „Þeir allra sterkustu" etja kappi í tölti á ís.

Hápunktur laugardagsins er SKRÚÐREIÐ um það bil 150 hesta frá Vatnsmýrarvegi, upp á Skólavörðuholt og niður Skólavörðustíginn og Bankastrætið, svo að Austurvelli og eftir Tjarnargötu inn í Hljómskálagarð og endað á sama stað og byrjað var við Vatnsmýrarveg.

Sunnudagurinn er svo helgaður æskulýðnum í hestamennskunni en sýningin „Æskan og hesturinn" hefur gengið í mörg mörg ár og þar leiða saman hesta sína hestamannafélögin á höfuðborgarsvæðinu. Ungir hestamenn sýna alls kyns kúnstir á fákum sínum í Reiðhöllinni í Víðidal og eru sýningar kl. 13 og kl. 16.

Aðgangur er ókeypis og því borgar sig að mæta tímanlega! Það er Landssamband hestamannafélaga í samvinnu við Höfuðborgarstofu, Íslandsstofu og hestamannafélögin á höfuðborgarsvæðinu sem standa að viðburðinum.