Seldi hátt í 20 þúsund plötur

„Þú segir mér ánægjulegar fréttir,“ segir tónlistarmaðurinn Helgi Björnsson. „Það er ákaflega gaman þegar vel gengur og ég er þakklátur fyrir að fólk hafi gaman af þessu.“

Árið 2011 seldi Helgi hátt í tuttugu þúsund plötur á Íslandi, sem gerir hann að næstsöluhæsta tónlistarmanni landsins á eftir Mugison. Þriðja hestamannaplata hans, Ég vil fara upp í sveit, seldist í um átta þúsund eintökum fyrir jól, auk þess sem plata hans með stórtónleikum í Hörpunni 17. júní seldist í hátt í sex þúsund eintökum, sem kom nokkuð á óvart. Þar fyrir utan seldust fyrstu tvær hestamannaplötur hans og Reiðmanna vindanna samanlagt í um 3.500 eintökum á árinu. Þá eru ótalin þau um það bil eitt þúsund eintök sem seldust af safnplötu Grafíkur, sem Helgi söng með hér á árum áður.

Aðspurður segist Helgi búast við því að halda aðra dægurperlu-tónleika í Hörpunni í sumar. Óvíst er þó hvort plata með þeim tónleikum kemur út annað árið í röð.

Hestamannaplötur hans þrjár hafa samanlagt selst í um 32 þúsund eintökum. Spurður hvort fjórða platan komi út á árinu segir hann það óákveðið. „Landsmót hestamanna verður í Reykjavík á þessu ári. Það ýtir kannski á mann eitthvað.“

Fari svo að Helgi sendi hvorki frá sér dægurperlu- né hestamannaplötu á árinu segir hann vel koma til greina að gera sólóplötu með nýju efni, þá fyrstu í þrettán ár. „Það fer að koma tími á það.“- fb