Kaupa tískufatnað undir áhrifum

Með tilkomu netverslana hefur það færst í aukana að fólk geri skyndikaup á meðan það er undir áhrifum áfengis. New York Times fjallaði ítarlega um málið í vikunni sem leið.

Samkvæmt New York Times gerist það æ oftar að fólk geri stórkaup á Netinu á meðan það situr að drykkju. Blaðið tók meðal annars viðtal við eina konu sem áttaði sig á því í þynnkunni að hún hafði keypt mótorhjólaferðalag um þvert Nýja Sjáland að andvirði 1,2 milljóna króna án þess að muna eftir því. Flest vefkaup eiga sér þannig stað eftir klukkan níu á kvöldin í hverju tímabelti fyrir sig og eru margar vefverslanir farnar að notfæra sér þessar upplýsingar með því að bjóða kvöldafslátt og lokka þannig neytendur inn á síðurnar. Netverslanir sem selja hátískufatnað hafa einnig grætt á þessu því drykkjan virðist losa aðeins um fjárhagshömlurnar.