Mæðgin keppa á Northern Wave

Spænski kvikmyndagerðarmaðurinn Sergio De Vega verður gestur á alþjóðlegu stuttmyndahátíðinni Northern Wave sem fram fer í Grundarfirði um helgina. Stuttmynd De Vega, Making Counts, verður sýnd á hátíðinni auk þess sem móðir hans mun keppa í hinni vinsælu fiskisúpukeppni sem haldin er í tengslum við hátíðina.

„Mömmu hefur alltaf langað til að heimsækja Ísland, fyrir okkur er landið mjög framandi og spennandi, þannig að þegar myndin mín komst að á hátíðinni var aldrei spurning um hver ferðafélagi minn yrði," útskýrir De Vega. Hann segir móður sína, Concepción Sánchez Casillas, vera hæfileikaríkan kokk og því hafi hann ákveðið að skrá hana til þátttöku í fiskisúpukeppninni sem haldin er í tengslum við Northern Wave.

„Hún er með tvær hugmyndir að ýsurétt sem hana langar að gera, en hún hefur ekki enn valið á milli þeirra. Önnur er uppskrift frá Norður-Spáni og hin er klassísk uppskrift frá Austur-Spáni."

De Vega kveðst spenntur fyrir heimsókninni til Íslands og segir það ekki skemma fyrir að stuttmynd eftir hann verði sýnd á landinu á sama tíma.

„Ég hlakka mikið til ferðarinnar. Það eitt að ferðast um landið er mjög spennandi og það eykur aðeins á spennuna að ég fái að sækja stuttmyndahátíð á sama tíma. Þetta verður án efa einstök ferð," segir De Vega að lokum. -sm