Söngkonan komin á fyrirsætuskrá

Söngkonunni ungu Lönu Del Rey er spáð frægð og frama á þessu ári en hún hefur nú skrifað undir samning við eina stærstu fyrirsætuskrifstofu heims; Next. Þykir samningurinn ávísun þess að Del Rey séu ætlaðir stórir hlutir á árinu en í lok mánaðarins kemur út ný plata með söngkonunni, sem átti eitt af lögum ársins 2011, Video Games.

Á skrá hjá Next eru fyrirsætur á borð við Abbey Lee Kershaw og Arizona Muse en einnig frægar dömur á borð við Alexa Chung og Jessie J. Talsverð fordæmi hafa verið fyrir því að leik- og söngkonur hafi verið fengnar til að vera andlit tískumerkja og því má búast við að Lana Del Rey verði áberandi á auglýsingaskiltunum í framtíðinni. Tískuheimurinn hefur þegar tekið henni opnum örmum en lög hennar voru spiluð undir sýningum Christopher Kane og Emilio de la Morena á tískuvikunum í haust.