Alltaf jafngaman á Íslandi

„Ég hef ferðast um heiminn og kynnst alls konar fólki sem túlkar listina á mismunandi hátt. Það er eitthvað við íslensku menninguna og fólkið hérna sem ég elska og þess vegna kem ég hingað aftur og aftur,“ segir bandaríski saxófónleikarinn Andrew D"Angelo.

Hann spilar á Café Rosenberg í kvöld ásamt Kjartani Valdemarssyni, Snorra Sigurðarsyni, Valdimari Kolbeini Sigurjónssyni og Einari Scheving. D’Angelo, sem er leiðandi afl í framúrstefnu New York-djassins, spilaði með sömu hljómsveit hér á landi fyrir tæpu ári.

D"Angelo greindist með heilaæxli fyrir þremur árum en sigraðist á því og er núna laus við meinið. „Ég hlakka mikið til tónleikanna á föstudaginn og ég elska Café Rosenberg. Ég hlakka yfirhöfuð alltaf til að spila á tónleikum en sérstaklega mikið núna eftir að hafa fengið heilaæxlið. Það fær mann til að kunna betur að meta lífið og tilveruna.“

Hann dvelur hér á landi til sunnudags og fer þá til Kaupmannahafnar þar sem hann mun dvelja í eina viku við tónleikahald. - fb