Frægur skilnaðarlögfræðingur hjálpar Önnu

Í bandarískum fjölmiðlum er því haldið fram að bílasalinn Cal Worthington hafi gert glæsibifreið Önnu Mjallar Ólafsdóttur upptæka, en þau standa nú í skilnaði. Anna er sögð hafa ráðið einn þekktasta skilnaðarlögfræðing Bandaríkjanna.

Anna Mjöll og Worthington giftu sig síðasta vor, en skömmu fyrir áramót óskaði hún eftir skilnaði. Worthington er einn þekktasti og auðugasti bílasali Bandaríkjanna, og fjölmiðlar vestanhafs greina nú frá því að harka sé tekin að færast í skilnaðnn. Samkvæmt gögnum sem fjölmiðlar vitnar til lítur Worthington svo á að honum sé einungis skylt að greiða Önnu andvirði tæprar hálfrar milljónar á mánuði næsta hálfa árið, en Anna telji að henni beri að minnsta kosti helmingur í glæsihýsi í Beverly Hills sem hann hafi gefið henni í brúðargjöf.

Deilur hjónanna munu vera nokkuð harðvítugar, en Cal er sagður hafa sent dráttarbíl til að gera Bentley bifreið Önnu upptækan í laumi þar sem honum var lagt fyrir utan heimili móður hennar.

Anna mun hafa ráðið lögmanninn Mark Vincent Kaplan til að gæta hagsmuna sinna við skilnaðinn, en er einn þekktasti skilnaðarlögfræðingur landsins og var Kevin Federline meðal annars innan handar þegar hann skildi við söngkonuna Britney Spears.