Maus með tónleika á Eurosonic

Hljómsveitin Maus spilar á Eurosonic-hátíðinni í Hollandi síðar í mánuðinum. Ekki er þó um að ræða endurkomu hinnar íslensku Maus heldur hollensku sveitina sem ber sama nafn og hún.

Hljómsveitin stígur á svið á Buckshot Café í borginni Groningen þar sem hátíðin er haldin en hún er jafnframt heimaborg Maus. Tónleikarnir verða fimmtudagskvöldið 12. janúar, sama kvöld og fjórir íslenskir flytjendur stíga á svið annars staðar í borginni, eða þau Lay Low, Ghostigital, Hjálmar og Sóley.

Hin hollenska Maus er hugarfóstur Gijs van Veldhuizen, fyrrum gítarleikara Audiotransparent. Sem Gijs í Maus stígur hann í fyrsta sinn fram á sjónarsviðið sem söngvari og lagahöfundur með eigið indípopp, ekki ósvipuðu því sem hin íslenska Maus spilar.

Fréttablaðið greindi frá því á miðvikudag að Biggi í Maus hefði kvartað yfir nafni hollensku sveitarinnar, enda hefur hin íslenska Maus einkaréttinn á því í Evrópu. Óttaðist hann að einhverjir sem ætluðu að sjá Gijs í Maus og félaga á tónleikum í Evrópu myndu ruglast á þeim og sinni hljómsveit. Það gæti einmitt gerst á Eurosonic-hátíðinni. -fb