Yrsa kennd við Columbia-háskólann

Bók Yrsu Sigurðardóttur, Þriðja táknið, er kennd á námskeiðinu "Scandinavian Crime in Film and Literature" við Columbia-háskólann í New York.

"Þetta er alveg frábært. Ég ætti kannski að fá gráðu út á þetta. Ég ætti að fá að taka þennan kúrs," segir Yrsa í léttum dúr.

Nemandi í námskeiðinu hafði samband við hana og bað hana að svara nokkrum spurningum um söguna sem hún gerði með mikilli ánægju.

Hún hefur áður fengið fyrirspurnir frá íslenskum nemendum sem eru að gera ritgerðir um bækur hennar og einnig frá Vancouver-háskóla í Kanada en þetta er í fyrsta sinn sem nemandi frá bandarískum háskóla hefur samband.

Þessi fyrirspurn er til marks um aukinn áhuga á skandínavískum glæpasögum vestanhafs. "Ég get ekki ímyndað mér að fyrir fimmtán árum hefði nokkur einasti skóli í Norður-Ameríku kennt skandínavískar glæpasögur. Það hefðu alla vega verið fáir í tíma," segir Yrsa.

Útgáfurétturinn á Þriðja tákninu hefur verið seldur á yfir þrjátíu tungumál, þar á meðal öll helstu tungumál Vesturlanda, auk arabísku, kínversku og japönsku, svo nokkur séu nefnd.

Yrsa leggur nú lokahönd á nýja glæpasögu. Þar fær Þóra Guðmundsdóttir, sem hún kynnti til sögunnar í Þriðja tákninu, frí. Sagan gerist bæði í nútímanum og á upptökuheimili á áttunda áratug síðustu aldar.

- fb