Anna Funder á Íslandi

Ástralski rithöfundurinn Anna Funder heldur fyrirlestur á vegum Stofnunar Vigdísar Finnbogadóttur í Odda í Háskóla Íslands í hádeginu í dag.

Anna Funder fæddist árið 1966 í Ástralíu, lauk lagaprófi og síðan doktorsprófi í listrænni sköpun.

Að námi loknu starfaði hún að mannréttindamálum fyrir Ástralíustjórn. Á árum sínum í Þýskalandi skrifaði hún bókina Stasiland, þar sem íbúar austan Berlínarmúrsins lýsa reynslu sinni af lögregluríkinu sem kommúnistar stofnuðu. Ugla gaf út Stasiland í íslenskri þýðingu fyrr á árinu.

Á fyrirlestrinum í dag ræðir Funder nýjustu skáldsögu sína, "All That I Am", sem gerist meðal annars í Þýskalandi nasismans. Bókin kom út í febrúar og hefur þegar hlotið fjölda verðlauna.

Martin Regal, dósent í ensku við Háskóla Íslands, kynnir höfundinn og verk hennar. Fyrirlesturinn hefst klukkan 12 í stofu 101.