Baulað á sýningu

Nýjasta kvikmynd Terrence Malick fékk vægast sagt slæmar móttökur við frumsýningu hennar á kvikmyndahátíðinni í Feneyjum um síðustu helgi. Með aðalhlutverk í myndinni fara Ben Affleck, Rachel Mc-Adams, Olga Kurylenko og Javier Bardem.

Myndin segir frá manni sem endurnýjar kynni sín við gamla vinkonu eftir að hjónaband hans og evrópskrar konu hans fer í vaskinn.

Áhorfendur á frumsýningu myndarinnar voru lítt hrifnir af nýjasta verki leikstjórans og létu óánægju sína í ljós með því að baula í lok hennar. Athæfið vakti athygli en einhverjir voru þó ósammála aðferðinni.

"Að baula á Terrence Malick-mynd. Það krefst sama hugrekkis og að sparka í Gandhi," skrifaði gagnrýnandinn Justin Chang á Twitter-síðu sína. Annar sagði: "Er ekki komið nóg af látum? Þið eigið að kallast fagfólk."

Ben Affleck sagði To the Wonder líkjast Transformers í samanburði við Tree of Life, síðustu mynd Malicks.