Íslensk fyrirtæki á tánum vegna olíuleitar við Austur-Grænland

Ellefu olíufélög sóttu um sérleyfi norðan Íslands í fyrsta útboði olíuvinnsluleyfa við austurströnd Grænlands. Eimskip er meðal fyrirtækja sem sjá fram á mikil tækifæri en forstjórinn segir kjörið að þjónustumiðstöðin verði á Norðurlandi.

Olíuleit Grænlendinga hefur til þessa verið bundin við vesturströndina og í fyrra var skoskt olíufélag bæði með borskip og borpall um 150 kílómetra vestur af Diskó-flóa. Nú er olíuleitin einnig að færast til austurstrandarinnar, að þeirri hlið Grænlands sem snýr að Íslandi.

Nýjasta útboðssvæðið er í hánorður af Íslandi og sóttu ellefu félög um sérleyfi í þremur hópum, en umsóknarfrestur rann út 15. desember. Grænlensk stjórnvöld hafa ekki greint frá nöfnum umsækjenda en áður var búið að skýra frá því að í forgangshópi voru olíurisar eins og ExxonMobil, Statoil, BP, Chevron og Shell.

Ráðamenn Eimskip eru meðal þeirra sem fylgjast grannt með þróun mála á Grænlandi, en þeir telja að Norðurland geti orðið þjónustumiðstöð, bæði við olíu- og námavinnslu. Gylfi Sigfússon, forstjóri Eimskips, bendir á Dysnes við Eyjafjörð sem kjörinn vettvang fyrir birgðastöð. Á Akureyri sé allt til staðar fyrir þyrlu- og flugþjónustu til að fljúga með áhafnir á borpalla. Bæði Akureyrarsvæðið og Húsavíkursvæðið séu tilvalin fyrir starfsemi af þessu tagi.

„Og miklir möguleikar fyrir okkur að taka þátt í því," segir Gylfi og kveðst horfa til næstu 5-10 ára.

Eimskip er í hópi um 25 aðila sem komnir eru í markaðsátak með Atvinnuþróunarfélagi Eyjafjarðar um viðskipti á Norðurslóðum.

„Við erum á tánum og leggjum mikið upp úr því, - erum með stóra hópa hér innanhúss sem eru að sérhæfa sig í þessum verkefnum á þessu norðuríshafi," segir Gylfi. Það nái ekki aðeins til námavinnslu og olíustarfsemi heldur einnig til norðuríshafsflutninganna, sem hann vonast til að verði að veruleika innan 5-10 ára.