Innlent

Áætlar fyrsta borpallinn við Jan Mayen árið 2017

Kristján Már Unnarsson skrifar
Olíustofnun Noregs áætlar í nýrri skýrslu að verðmæti olíu- og gaslinda við Jan Mayen geti verið þrettán þúsund milljarðar króna og að hreinn hagnaður af vinnslunni geti numið allt að níu þúsund milljörðum. Norðmenn gera ráð fyrir að fyrsti borpallurinn verði kominn á svæðið árið 2017.

Eyfirðingar fundu smjörþefinn í sumar af þeim umsvifum sem Norðmenn hafa sett í gang á hafsvæðunum norðaustan Íslands þegar floti rannsóknarskipa kom til Akureyrar til áhafnaskipta og til að sækja vistir og þjónustu.

Táknræn ferð þáverandi olíumálaráðherra Noregs til Jan Mayen fyrir þremur árum markaði stefnu norsku ríkisstjórnarinnar og nú hefur Olíustofnun Noregs birt skýrslu þar sem lagt er mat á þær tekjur sem norskt samfélag gæti vænst af Jan Mayen-svæðinu. Settar eru upp tvær sviðsmyndir um verðmæti olíu- og gaslinda, í norskum krónum, en þegar umreiknað er yfir í íslenskar er hærra gildið þrettán þúsund milljarðar íslenskra króna en það lægra fjögur þúsund milljarðar íslenskra króna.

Sviðsmynd af tímaáætlun gerir ráð fyrir fyrsta borpallinum árið 2017, uppbygging vinnslusvæðis hefjist 2022 og vinnslu ljúki í kringum árið 2050.

Gríðarlegur kostnaður fylgir uppbyggingu vinnslusvæðis við Jan Mayen og rekstri þess en þegar hann hefur verið dreginn frá er áætlað að hreinn hagnaður olíu- og gasvinnslu þar geti orðið níu þúsund milljarðar íslenskra króna en lægra gildið er 2.800 milljarðar króna.

Tekið skal fram að Olíustofnun Noregs birtir þessar tölur með fyrirvara um að meiri rannsóknir þurfi til að staðfesta umfang olíulinda og tölurnar ná ekki yfir íslenska hlutann. Engu að síður er athyglisvert að norsk stjórnvöld telja að borpallar geti verið komnir á svæðið eftir fjögur til fimm ár og að umfang fjárfestingar geti orðið, á íslenska mælikvarða, nánast stjarnfræðilegt eftir aðeins tíu ár.


Tengdar fréttir

Norðmenn setja milljarða í að undirbúa olíuvinnslu við Jan Mayen

Norsk stjórnvöld áforma að verja nærri þremur milljörðum íslenskra króna, 130 milljónum norskra króna, á næsta ári til að undirbúa tvö ný svæði til olíuvinnslu. Þetta eru Jan Mayen-svæðið og sá hluti Barentshafs sem er vestan lögsögumarkanna við Rússland. Þetta kemur fram í fjárlagafrumvarpi ríkisstjórnar Noregs fyrir árið 2013 sem nú er til umfjöllunar í Stórþinginu. Í fréttatilkynningu olíu- og orkumálaráðuneytisins segir að áætlað sé að nota fjármunina til kortlagningar, hljóðbylgjumælinga og annarra jarðfræðirannsókna á umræddum hafsvæðum. Fyrir áform íslenskra stjórnvalda að opna Drekasvæðið til olíuvinnslu teljast það góð tíðindi hversu þunga áherslu Norðmenn ætla að leggja á Jan Mayen-svæðið.

Mest lesið


Fleiri fréttir

Sjá meira


×

Mest lesið