Ferguson skýtur föstum skotum á alla vítaspyrnudómana hjá Man City

Alex Ferguson tekur þátt að venju þátt í sálfræðistríðinu fyrir stórleik ensku úrvalsdeildarinnar sem fram fer á sunnudag. Knattspyrnustjóri Manchester United sagði á fundi með fréttamönnum að það væri búið að setja rannsóknarnefnd á laggirnar hjá breska þinginu ef Manchester United hefði fengið jafnmargar vítaspyrnur það sem af er keppnistímabilinu og Manchester City hefur fengið.

Tölfræðin lýgur ekki en Manchester City hefur fengið dæmdar 21 vítaspyrnur á heimavelli frá því í upphafi keppnistímabilsins 2010-2011.

Man City hefur fengið fjórar vítaspyrnur í síðustu þremur leikjum sínum á Etihad Stadium. Tvær gegn Aston Villa, eina gegn Real Madrid og eina gegn Everton.

„Þeir hafa fengið dæmdar 21 vítaspyrnur eða svo á einu ári," sagði Ferguson á fundi með fréttamönnum í dag. „Það væru mótmæli í gangi og búið að stofna rannsóknarnefnd á þinginu ef við værum með þessa tölu. Viðureignir okkar gegn Liverpool undanfarin 25 ár hafa verið ótrúlegar, þeir leikir hafa alltaf verið þeir mikilvægustu. Það hefur aðeins breyst þar sem að Liverpool er ekki að gera atlögu að titlinum eins og Manchester City. Við erum helsti andstæðingur Man City og þeir eru helsti andstæðingur okkar. Gengi þeirra breyttist um leið og Sheikh Mansour eignaðist félagið. Frá þeirri stundu vissum við að hlutirnir myndu breytast. En þetta er liðin tíð og við verðum að takast á við nýjar áskoranir. Líkt og við gerðum þegar Chelsea með sitt sterka lið, og Arsenal tók við af Liverpool sem okkar helsti andstæðingur. Við höfum glímt við slíka samkeppni áður," sagði Ferguson.

Leikur Manchester City og Manchester United hefst kl. 13:30 á sunnudaginn og verður hann í beinni útsendingu á Stöð 2 sport 2 | HD.