Hannar fyrir stórfyrirtæki í Suður-Kóreu

"Ég vissi ekkert hvað ég var að fara út í, ég fékk bara símtal frá fyrirtæki í New York sem átti að endurhanna vörumerkið og vildi fá mig til að uppfæra vörulínuna," útskýrir Sigríður.

Símtalið fékk hún fyrir rúmu ári og síðan þá hefur hún átt vikulega símafundi með stjórnendum Jaju auk þess sem hún hefur flogið út til að vinna með hönnunarteymi þeirra næstum mánaðarlega.

Aðspurð segir hún mikla vinnu liggja að baki verkefninu en tekur fram að sú vinna hafi verið stórskemmtileg.

"Ég fékk alveg frjálsar hendur við hönnunina og maður fær ekki oft tækifæri til þess. Ég þurfti svo að kynna mér lifnaðarhætti Suður-Kóreubúa áður en ég hófst handa því það er margt ólíkt með þeirra menningu og okkar.

Þeir sitja til að mynda mikið á gólfinu og búa mjög þröngt. Baðherbergin þeirra eru eins og stór sturtuklefi og allar snyrtivörur eru geymdar í svefnherberginu. Þeir vinna líka mikið og þess vegna þurfa heimilin að vera þægileg og einföld."

Samstarf Sigríðar og Jaju mun standa næstu fimm árin og því er vinnu hennar ekki nærri lokið. Jaju hefur þegar opnað eina verslun sem selur hönnun Siggu og mun opna fleiri á næstu vikum.

Aðalverslun þeirra verður svo opnuð um áramótin og verður sú á sjö hæðum á besta stað í Seoul. "Við erum bara rétt að byrja," segir Sigga glaðlega að lokum.

- sm