Rowling tekur upp hanskann fyrir efnalitla

J.K. Rowling, höfundur bókanna um Harry Potter, segist byggja nýjustu skáldsögu sína að hluta til á eigin reynslu og að hún deili jafnframt á ríkjandi pólitískt ástand þar sem jafnan sé litið sé niður á þá sem búa undir fátæktarmörkum.

Casual Vacancy, fyrsta skáldsaga Rowling fyrir fullorðna, hefur verið beðið með mikilli eftirvæntingu en hún er væntanleg nú í vikunni.

Rowling hefur áður lýst hvernig hún barðist í bökkum áður en fyrsta bók hennar um galdrastrákinn sló í gegn og var upp á velferðarkerfið komin, sem hún stæði í þakkarskuld við.

Í viðtali við breska dagblaðið Guardian um helgina segist hún skynja breytt andrúmsloft í Bretlandi, sérstaklega í viðhorfum gagnvart þeim sem lifa við lökustu kjörin.

"Ástandið minnir dálítið á fyrri hluta 10. áratugarins þegar gerðar voru breytingar á bótakerfinu og skyndilega var staða einstæðra foreldra orðin aðeins verri.

En staðan er ekki "aðeins verri" fyrir þá sem eru í þessum sporum og jafnvel tíu pund á viku geta skipt sköpum."

Casual Vacancy kemur út í íslenskri þýðingu hjá Bjarti síðar í haust.