Rifbeinin fótósjoppuð

Fyrirsætan Karlie Kloss situr fyrir hálfnakin í októberhefti japanska tímaritsins Numéro en eitthvað er nú búið að fikta við myndina.

Ljósmyndarinn Greg Kadel festi Karlie á filmu og á upprunalegu myndinni sést vel í rif- og viðbein stúlkunnar. Myndin sem birtist hins vegar í tímaritinu er fótósjoppuð þannig að beinin á þessari tvítugu fyrirsætu eru ekki eins áberandi. Sumir hafa gagnrýnt þetta fótósjoppævintýri en það er stutt síðan mynd af Karli vakti mikla hneysklun.

Karli sat fyrir í ítalska Vogue í desember í fyrra og varð allt vitlaust þegar myndir af henni, þar sem vel sást í mjaðmabeinin og lítið mitti hennar, leituðu á vefsíður sem hvetja til átröskunar.