Um 800 nemendur framkölluðu risaskjálfta

Um 800 nemendur leikskóla, grunnskóla og Fjölbrautaskóla Suðurlands, auk starfsmanna Ráðhúss Árborgar komu saman í miðbæjargarðinum á Selfossi í dag og framkölluðu þar jarðskjálfta að stærðinni 6,5 með hoppum sem allir framkvæmdu í einu. Uppákoman var liður í hreyfingarátaki Fjölbrautaskóla Suðurlands veturinn 2012/2013 en skólinn er heilsueflandi skóli, eftir því sem fram kemur á fréttavefnum dfs.is.

Tveir af íþróttakennurum skólans stýrðu fólksfjöldanum en starfsfólk frá Rannsóknarmiðstöð Háskóla Íslands í jarðskjálftaverkfræði á Selfossi sá um að mæla skjálftann. Uppákoman var hin mesta skemmtun enda höfðu allir gaman af því að komast út í góða veðrið og hoppa aðeins.