Innlent

Grunaður fíkniefnaframleiðandi í varðhaldi til 21. september

Jón Hákon Halldórsson skrifar
Maðurinn leiddur fyrir dómara í dag.
Maðurinn leiddur fyrir dómara í dag. mynd/ stöd 2
Karmaðurinn sem var handtekinn í Efstasundi í gær, grunaður um að standa að baki amfetamínframleiðslu, var úrskurðaður í gæsluvarðhald til 21. september á grundvelli rannsóknarhagsmuna.

Maðurinn var handtekinn eftir að lögreglan fann búnað og efni til framleiðslu fíkniefna í bílskúr í Langholtshverfinu síðdegis í gær. Unnið hefur verið sleitulaust að rannsókn málsins en ljóst er að það er mjög umfangsmikið. Lagt hefur verið hald á verulagt magn af tækjum og efnum í þágu rannsóknarinnar, en í dag hefur lögreglan jafnframt framkvæmt húsleit í Hafnarfirði í tengslum við málið.

Við rannsóknina hefur lögreglan á höfuðborgarsvæðinu notið aðstoðar sérfræðinga frá Háskóla Íslands, Slökkviliði höfuðborgarsvæðisins auk sprengjusérfræðinga frá embætti ríkislögreglustjóra.

Nánar verður fjallað um málið í kvöldfréttum Stöðvar 2.


Tengdar fréttir

Engin sprengihætta vegna amfetamínverksmiðjunnar

Lögreglan upprætti í gærkvöldi amfetamínverksmiðju í bílskúr í Efstasundi í Reykjavík. Töluverður viðbúnaður var vegna málsins og var hluta götunnar lokað, enda um afar eldfim efni að ræða í slíkri framleiðslu.

Grunaður fíkniefnaframleiðandi með leikskólabarn á heimilinu

Aðgerðir lögreglunnar og slökkviliðsins vegna amfetamínverksmiðjunnar í bílskúr í Efstasundi stóðu yfir í að minnsta kosti hálfan sólarhring, samkvæmt heimildum Vísis. Maðurinn sem grunaður er um að bera ábyrgð á framleiðslunni er tæplega fimmtugur fjölskyldumaður með barn á leikskólaaldri á heimili sínu.

Ákvörðun um gæsluvarðhald í fíkniefnamálinu tekin í dag

Karlmaður á fimmtugsaldri, sem handtekinn var í gær vegna fíkniefnamálsins í Efstasundi, er enn í haldi lögreglunnar á höfuðborgarsvæðinu í tengslum við rannsókn málsins. Ákvörðun um hvort krafist verður gæsluvarðhalds yfir manninum verður tekin síðar í dag. Rannsókn málsins er enn á frumstigi og því er ekki hægt að veita frekari upplýsingar um gang hennar.

Húsleit í Trönuhrauni vegna amfetamínmálsins

Lögreglan á höfuðborgarsvæðinu gerði húsleit í Trönuhrauni í Hafnarfirði í morgun vegna rannsóknar á fíkniefnaverksmiðjumálinu sem greint var frá í gær. Samkvæmt upplýsingum fréttastofu er hluti húsnæðisins í Trönuhrauni í eigu mannsins sem var handtekinn í Efstasundi í gær.

Mest lesið


Fleiri fréttir

Sjá meira


×

Mest lesið