"Baltasar Kormákur orðinn Yslendingur"

„Það er náttúrulega hvalreki fyrir mitt litla fyrirtæki að vinna með manni eins og Baltasar Kormáki sem er fagmaður fram í fingurgóma," segir Jón Gunnar Geirdal, sem stofnaði markaðsfyrirtækið Ysland fyrir nokkrum vikum, og er strax byrjaður að sjá um markaðsmál sem tengjast leikstjóranum knáa hérlendis.

„Ég mun sjá um að kynna þau verkefni hér heima sem eru á næstunni hjá honum. Hann er lítið hér heima enda upptekinn maður í mörgum verkefnum. Baltasar Kormákur er orðinn Yslendingur, hef ég grínast með undanfarið," segir Jón Gunnar spakur og vísar í nafnið á fyrirtækinu, Ysland.

Markaðsfyrirtækið Ysland er tiltölulega nýtt af nálinni en Jón Gunnar er eini starfsmaður þess sem stendur. „Það er mikið af skemmtilegum verkefnum í gangi. Ég hef verið með rokktónleikana Rokkjötna, kvikmyndina Frost, Á sama tíma að ári hjá Borgarleikhúsinu, sex bækur fyrir Bjart útgáfufélag, tónlistarverkefni fyrir Senu og svo Bond-partý á næstunni," segir Jón Gunnar sem hefur í nógu að snúast.

Á morgun verður haldin heljarinnar veisla á vegum Yslands í Sjóminjasafninu úti á Granda. „Þá ætla ég að lýsa yfir sjálfstæði, kynna nýjan þjóðfána og skjaldarmerki," segir hann.

Hægt er að skoða heimasíðu Ysland hér og Facebook-síðuna hér.